ابويا مزعل مراتى

السلام عليكم ورحمه الله وبركاته
من فضلك ممكن تنزل الكلام من غير اسم وصوره 
انا عاوزه افضفض معاكم بس شويه
انا مرات اخويا عند اهلها بقالها اسبوعين 
بابا كان زعق معاها شويه وشتمها بوالدها 
وهيا والدها ووالدتها متوفين 
بس هيا ردت عليه وقالتله متشتمش ابويا 
قالها طيب خدى بنتك واطلعى. اخدت البنت وطلعت بس بعصبيه ونرفزه جامده 
هو قام اضايق وزود فى الشتيمه وطلع وراها ضربها بالقلم وقالها اطلعى من البيت وحلف ما هيا هتبات فيها 
كان وقتها اخويا مش هنا 
المهم جيرنا جم على صوت الزعيق 

وكلهم يقولولها تعالى باتى عندنا للصبح 
بس طبعا مكنش ينفع وهيا كمان رفضت 
وراحت عند اختها 
اخويا لما جه عرف الموضوع زعل طبعا من بابا ومن مراته 
ازاى بابا يمد أيده عليها وهيا كمان ازاى ترد على بابا قال خلاص خليها قاعده شويه لحد ما الأمور تهدأ شويه ودا كمان لانه كان زعلان منها اصلا قبلها لأنها بتنسى كتير وأوقات بتطنش حاجات كتير هو بيقولها عليها دا عن كلامه والله اعلى واعلم
المهم هو راح لها وادها فلوس وبعتلها لبس للعيال وقالها خليكى يومين كدا وبعدين هبقى اجى اخدك 
ومتروحيش مع اى حد الا لو انا قولتلك 
قالتله ماشى 
بعد بكام يوم ماما وانا واخواتى البنات فضلنا نزن عليه هات مراتك 
والبيت مالهوش لزمه من غير العيال 
المهم ماما قالتله انا هروح اجيبها ومتزعلنيش منك بقى 
قالها خلاص عشان خاطرك انتى يا ماما 
اتصل على مراته قالها مامتك جايه تاخدك ابقى تعالى معاها قالتله ماشى 
ماما راحت عندهم البيت وقعدت تتكلم معاها وتقولها يا بنتى عيشى وربى عيالك واستحملى شويه ما احنا ياما اتشتمنا واستعمل فينا وعشنا وانتى جوزك اصلا شاكى منك كتير وانا بدارى عليكى فى حاجات كتير وانتى عملتى كذا وكذا وانا ادارى واخبى عن حماكى وعن جوزك وأخواتك دول ياما اتعمل معاهم بردوا والدنيا كلها على دا الحال قامت مرات اخويا فجأة قالتلها انا مش حرجع البيت الا لما .....
كسفت ماما ومرضتش تيجى معاها
وقالت لها مقابل اللى زعلنى وكرشنى هو اللى يجى با خدنى
قالت لها ما انا مقامى من مقامه
المهم مرضتش بردوا
ماما جت من هناك زعلانه وقعدت ټعيط أنها كس..فتها بالشكل دا وخصوصا انها اول مره تروح لها
اخويا لما عرف اتصل عليها وقالها هو انا مش قولتلك امك جيالك تعالى معاها
انتى بتحرجينى
وزعل وقفل التليفون فى وشها
المهم بعدها بيومين احنا عاوزين نشوف العيال
وانا اصلا طول الوقت بعيط لان انا بحب ولاد اخويا اوى وصعبان عليا اللى حصل وعدم وجودهم فى البيت مخلينا زى الأيتام ومالهوش اى طعم
بعدها بيومين بابا واحشه العيال جامد
قالى روحى كلميها قولبلها تبعتهم نشوفهم وبكره نوديهملها
بابا على الرغم من أن طبعه شديد وطول الوقت صوته عالى وانا اصلا بضايق من كدا إلا أن روحه فى العيال
المهم بأننا بردوا على الرغم من انى زعلت عشان ماما الا انى روحت كلمتها
وقعدت أنصحها وغلطتها أنها مسمعتش كلام جوزها ورجعت مع ماما ليه ولمينا الموضوع
يا بنتى انتى اول مره تعرفى بابا ما انتى معانا بقالك ٧ سنين فى قبل بيتنا وقبل كدا طول عمرك وانتى معانا فى الشارع
المفروض تكونى عرفتى طبع حماكى
ومترديش عليه خالص انتى بتستفزيه
ودا مش كويس ودا راجل كبير فى مقام ابوكى
وخلصت ضميرى